في السكة الحديد.. اللي اختشوا ماتوا

عبدالرحيم كمال

شطارة معلم بنى له عمارة.. لأ مش عمارة.. دي سكة حديد.. كان هذا هو الموجز وإليكم الأنباء بالتفصيل..

جباية مبتكرة

آخر ابتكارات الجباية فازت بها هيئة السكة الحديد.. وهي معاملة أي شئ يحمله المسافر غير الحقائب طرودا وبالتالي يتم تحصيل ٥١ ج عن كل طرد.. يعني لو معاك كرتونة أو قفة -مقطف- او صرة -بقجة-أو سبت، مطلوب ٥١ ج عن كل حاجة منها.. سألنا: ليه، قالوا ده نظام جديد بدأ العمل به.. وطبعا لأن مصر كلها أرياف، فلابد أن يحمل معظمنا، ورغما عنه، شوية حاجات ببلاش مجاملة من الأهل والأصدقاء، شوية فايش أو قرقوش أو ملوخية ناشفة أو ٢ ك لحمة أو فرختين وكام حمامة.. ودي من الوالدة، ودي من عمتك أو خالتك.. والمجاملات كتير وتفاجأ بيها على رصيف المحطة.. يعني الكل جاملك للآخر.. جاب لك الهدية ووصلها لك لغاية القطر.. دون الانتباه إلى جابي الضرائب الجديد..

مجرد سؤال

بالمناسبة، سؤال عبيط شوية لعباقرتنا الكرام في السكة إياها: لو في كل محطة موظف واحد لهذا الأمر.. كم عدد موظفي الجباية الجدد.. حتى لو اقتصر الأمر على المحطات الكبيرة، المدن والمراكز، دون الاهتمام بالقرى والنجوع والكفور.. فكم عددهم وكم تبلغ مرتباتهم.. أم إنه نوع من تطوير السكة الحديد.. اللي اختشوا ماتوا والله.. وعلى فكرة ملف السكة إياها مليان ملاحظات سودة.